SCOPA 50TH ANNIVERSARY 

FAAFETAI MAI LE SCOPA

Ou te muai taina le vaiafei ma ou vai sausauina le paia ma le mamalu tele o Sa ma faiga o Samoa; o le atunuu ua uma ona tofi, tofa.
Tulouna ia ou paia faale-talalelei, o mamalu faa faiga malo i Sasa'e ma Sisifo nei. Aemaise lava upu taotooto i le afifio o Tama ma le paia o aiga o Tupu, aiga o Nofo ma aiga o Papa.
Tulouna le mamalu o le Usoga a Pule ma Tumua ma faleupolu o tofiga i Tulimatala ma Si'ufaitotoa.
Tulouna le paia o Tama Faasausau ma le Nofo a Maopu o le Faleagafulu, Tama Matuama le mamalu o le Fale Tutuila. Tulouna le Laau na amotasi, Faatui ma Tootoo o le Manuatele.Tau ia ina ou ufitia ulutao aua le maota tulutulu i tao, ua soo ona tai ao, aua e faigata Samoa o le Ao mamala i le faasouga o Ao ma le atufolasa.
A o lou fia pai i vai o le tama talu ata ua toto o le ava. Ua moomoo faalupe o naumati ai nei le igoa o le SCOPA, e vili tonu le ifi a Maina ma fagatonu le malama, e molimolioo atu ai se Faafetai faalelava talu ai le SAMIGA o lona IUPELI AURO- 10, 11 ma le 12 o Tesema 2003.
E muamua lava le Faafetai faapitoa i lau Afioga Akiepikopo Alapati Matealiga, Lau Susuga i le Taitaifono o Ekalesia Kerisiano Soofaatasi, Susuga Oka Fauolo. Lau Susuga i le Toeaina Faatonu, Susuga, Tautiaga Senara. Tau ina utu pupu pea e le Agaga o le Atua ma ia maua pea outou faiva folafola ma le tausia o Sakalameta. Faafetai fai tatalo.

Faafetai faapitoa i Lau Susuga i le Tapaau Faasisina, Susuga Malietoa Tanumafili 11. Faamalo i lau tapuaiga. O lau lua miti ma Tupua Tamasese Meaole lea ua tino mai lona limasefulu o tausaga o lona matua.
Faafetai i le Sui o le Fono a Sui Tofia, lau Afioga Faumuina Anapapa, o le Tupufia, i lou faatasi mai i le faamamaluga o le matou faamoemoe. Na amata mai lava i le po o le Aso Lulu seia oo i le Aso Tofi. Faafetai ma faamalo tele atu.
E le faaitiitia le Faafetai i lau Afioga i le Alii Palemia, ae maise le Minisita o Aoga. E ui ina sa oulua toesea ona o fonotaga faavaomalo, ae peitai sa lagona lo oulua lagolago malosi mai.
Faafetai fapitoa i lau Afioga i le Sui Palemia, Afioga Misa Telefoni. Faamalo saunoa i le Aso Lulu ma le Aso Tofi. Faafetai i le tofa tatala i lau afioga i le Laau na fausia. Faafetai tele i lau Afioga Faumuina Liuga mo le suaina o le eleele mo le amatalia o la tatou galuega, aua le Kolisi o Samoa ma le SCOPA. Faafetai ma faamalo tele atu ile paia ma le mamalu tele i afioga i Alii Minisita uma o le Kapeneta. Faafetai tele i lo outou faatasi ma le lagolago tele mai i nei aso e tolu ua mamalu ma matagofie ai lo matou faamoemoe.
E fia avatu foi la matou Faafetai faapitoa i lo matou Faatama, Lau afioga i le Alii Minisita, Palusalue Faapo 11. Sa matou matua misia lava oe, talu ai lou toesea i Europa i Fonotaga faavaomalo. Ui i lea, matou te talitonu i lau tatalo ma le tapuaiga ua ae ai ma le malo lo tatou faamoemoe sa fauao, faupo i le lua tausaga ua tuanai. E le faagaloina e le SCOPA lou sao taua, Faafetai tele.
Faafetai, faapitoa i Afioga i Tamaaiga ma a oulua Masiofo. Lau Afioga i le Tuiatua Tupua Tamasese Suatipatipa 11. Faamalo ma Faafetai tele i lo oulua faamamalu mai ua atoa tino o le tama i le sauniga o lo tatou Iupeli Auro.
Faafetai faapitoa i le Hai Komisi Niu Sila Dr Penelope Ridings, mo lau saunoaga matagofie ma le logoleleia i lo matou aso. Faafetai faapitoa i le paia ma le mamalu tele o le au valaauli8a o e na talia lo matou talo faaaloalo atu. Ua auau tetele o matou aso faailogaina i lo outou faaaloalo mai.
Faafetai ma faamalo tele atu i le paia o le Ekalesia pele i Vaivasetai. i lau susuga a le Faafegaiga Taulagi., Susuga i Aoao, ma Afioga a Tiakono ma le aoao o le EFKS i Vaivasetai. La matou paaga totino i lenei 50 tausaga. Faafetai faaaloalo i la outou taalolo.
O le agaga faagfetai tele e fia faamauina i le igoa o le SCOPA mo le paia ma le mamalu tele mai Tutuila ma Manua, le SAMCO/SCOPA mai Aotearoa, SCOPA uma mai Amerika, Kanata, Ausetalia, Fiti, Tokelau ma isi itu uma o le lalolagi.; o le a ea sa matou upu? Faamalo le loto aoga. Ua maualuga lo tatou Iupeli Auro i lo outou Malaga mamao mai ele taugofie pasese i lo outou lelesai mai atunuu mamao. Ia ;tumau lo tatou galulue ma le faimea faatasi. Ia manatua mai le tatou galuega lea o lea amata.
E le faaitiitia le Faafetai i o matou uso ma tuafafine i le mamalu o le nofo a Peresetene ma Faalapotopotoga uma a Tama ma Teine Tuai a Avele, Vaipouli, Leulumoega Fou, Malisi Sagato Iosefo, Sagata Malia i Vaimoso ma Sanele i Moamoa. Ia tumau lo tatou fealofani ma le fealoaloai faatamalii. Faafetai tele i lo outou afifio mai. 
Faafetai faapitoa i le Pule Sili, lau Tofa Levaopolo Tupae Esera, ma le Ofisa o Aoga. Malo le galulue, Faafetai mo mea uma. O le tatou galulue soosoo tauau na iu manuia ai aso e tolu o la tatou fuafuaga fai faatasi. Malo fai o le faiva.

E fia momoli atu le Faafetai faapitoa i le susuga i le Alii Pule, le aiga Faiaoga ma tama ma teine uma o le Laumua o le Kolisi o Samoa. Faafetai mo le saunia lelei o pese ma faafiafiaga, ae maise toniga matagofie na saunia. Faafetai tele i le aufaafiafia a Valovalo Tusani na gafa ma le po o le faalauiloaina o le tatou tusi; ae maise tama ma teine nofotumau faapea alii ma tamaitai SCOPA - Agnes Saili Kerslake, Ata Nonumalo, Simea Avei Fata, Vanya Peteru ma Filifilia Iosefa. Malo le fai mea lelei, Faafetai pelega o le Kolisi ma le SCOPA. Le Kolisi e pele i le agaga, ua le ole lea. Faafetai tele i le mamalu o matua ua oge upu le gagana. Faafetai pelega o tama. Ou te le tau selu atu. Faafetai i lou titi faitama. Mo le vasega 13 o le 2003, o outou o SCOPA nei, ulufale mai loa I lau tou faalapotopotoga, e tautua atu ai i lau aoga.
E faapito augafa ae le faaitiitia le Faafetai i o matou uso, tuafafine ma tuagane o le SCOPA i Samoa nei. Na maligi loimata o le fiafia ma le Faafetai ae i le Atua ona o lo outou pale mai. Ua faataalolo o outou paia ma mamalu ma maa salafalafa o loo outou ee ai, ae faamaopoopo ma lagolago mai lo tatou aso. I le amata mai i le po o le Aso Lulu i le faailoaina o le Tusi o lo tatou Talafaasolopito, malo le toto aoga. O le Savali faaaloalo i le taeao o le Aso Tofi o se vaaiga uiga ese i lo outou toatele. Sa taumate i le ete.. Ou te faamalie atu, ua le mafai ona faatali pea le sisiina o le Tagavai o lou Malo, ona o le toatele o outou, aua e amata la'u upu, e lei motu mai lava i luma o le malumalu Metotisi le solo a le Kolisi o Samoa. O le a outou silasila lava i ai i le tatou video faatau.

E le faagaloina le faamalo i le nofo a Vasega o le SCOPA i lo outou sao taua i itu eseese uma. Faafetai i o outou Taitai ma outou uma taitoatasi le faaauau ma taifai pea lena tulaga lelei ma ia manatua la tatou galuega. O le Faafetai faapitoa i tamaitai o le itupa faimea mafai, o e sa gafa ma le tuufaatasia o le tusi o le Tala Faasolopito o le Kolisi.
Faafetai tele Leatuolevao Ruby Vaa, Masiofo Filifilia Tamasese, Mataina Te'o, Gatoloaifa'aana Tilianamua Afamasaga, Ruta Fiti Sinclair faapea Aiono Sia Malietoa. Ua tusia o outou igoa i le Talafaasolopito o le Kolisi ma Samoa. E moni, e au lava le inailau a tamaitai.
Ou te fia faafetaia lava le Bluebird Printery (Fiji) ona o le lolomiina o le Tusi i se taimi puupuu i le tuliina o le taimi. Faafetai faapitoa i e na foai mai tupe sa fesoasoani i lea galuega e pei o le Hai Komisi Niu Sila Dr Penelope Ridings, le UNESCO, le TAB ma isi o le a maua mulimuli ane.
O le Faafetai faapitoa i ofisa faasalalau, ma nusipepa uma - le afioga i le tamaitai pule o le SBC ma le aufaigaluega, malo le fesoasoani mai i le tau faalauiloaina o lo tatou Iupeli Auro. Ae maise lava lo matou agaga Faafetai e fia molimolio'o atu i lau Afioga i le Alaalatama Savea Sano Malifa ma le Samoa Observer ona o le tele o lo outou sao i le faamoemoe vaivai o le Kolisi ma le SCOPA. E leai se auro e totogi atu ai la outou galuega fai ma le alofa ona o le le tagolima o le SCOPA. Faafetai loto aoga. 

E le mafai ona faagaloina o matou Faiaoga, aemaise e na amataina mai le galuega i tausaga amata o le Kolisi. Faafetai tele i lau Afioga Masiofo Laulu fetauimalemau Mataafa. O lou faatasi mai ma le alaina o le Keke o le Iupeli Auro, o se itu faagalo gata. Faafetai ia te oe le Tina, vaeatu ou paia. E le faagaloina Tootoo Pulotu, Toleafoa Gutu Faasau, Galumalemana Netina Galo Schmidt, Bob Bachelor na Malaga faapitoa mai Amerika. Matron Iokapeta Memea Petaia, Fiapalagi Faasau, Bev Barlow, Anna ma Phillopose Jacobs, James Waterhouse, Peter Sinclair, Aliimuamua Esekia Solofa, Leufisa Seumanutafa, Rennie Kohlhase, ma isi e toatele. Faafetai i lo outou sao taua. Ou te fia faamauina foi le Faafetai faapitoa ia Ros ma Gordon Lorimer, ma Ruth ma Ted Bradstock, e ui ina lei faatasi mai ae na auina mai a latou fesoasoani ma tau o a latou Tusi. E le galo Lorimer sa aoina le tatou 1st XV o le Lakapi - e le iloa faiaina.
Faafetai tele mo le Tupe paia lea ua e maau ma fatuatia ma e aao mafola i ai e le faigofie, aua le faamoemoe o le Kolisi ma le SCOPA I lona faletele e faaaoga ma tua i ai le Laumua i ana mea e fai, aemaise se taunuuga o le SCOPA i le lumanai.

Ua malie le pule I mana. Ua malie le la'I Toiva. Ua malie suaavasele, o lau pule ua toto tetele. Lenei ua ou sapaia faatua eleele. Ua atue le Fega i Foa. Ua malie le faatolotologa tama, ua malie le Papa I Galagala. Ua atoa tino o le tama na moe i le ana. O le ao o lau foai silasila i le tala o le tupe o i lalo. Ua silafia e le Atua lau mea na fai, o Ia lava e toe taui ma faatumu e sautualasi lou aao foa'I mai.

Faafetai Faafetai Faafetai tele lava.
O le a fofoga atu lo outou mamalu e, le SCOPA I le tatou fono tele faaletausaga i se taimi lata mai lava. 


Leota Leulua'ialii Ituau Ale - Peresetene
Ma le Komiti Fa'afoe - SCOPA Samoa.